Bly kalm en vertrou

Jy ken seker die spreekwoord om tussen die duiwel en die diep blou see vasgekeer te wees. Ek weet nie of dit van die Israeliete af kom nie, maar hulle was letterlik vasgekeer tussen die duiwel en die diep blou see.
Toe die Farao hulle uiteindelik losgelaat het, het Moses hulle gelei tot by die Rooisee, maar voor hulle ‘n plan kon maak om verder te trek, het Farao se hele weermag op hulle toegesak. In die verte kon die volk die stof in die lug sien optrek en hulle het geweet: Hier kom moeilikheid!
Verskrik het hulle na Moses gehardloop. Hulle was eintlik lelik met hom en het op hom afgegaan omdat hy hulle gelei het om daar in die woestyn langs die see doodgemaak te word. Dit is wat vrees doen. Dit bring die lelik in ʼn mens uit en dan gaan jy af op ander mense.
Moses het die ervaring van God by die bos gehad. Hy het geweet God sal ʼn plan maak. Wat die plan op daardie stadium was, was nog nie vir hom geopenbaar nie, maar hy het vertrou. Hy weet God sou ʼn plan uitvurk.
En het God nie ʼn massiewe plan uitgevurk nie? Hy maak eenvoudig ʼn pad deur die see. Met ʼn wind wat sterk waai, maak Hy ʼn pad waar die hele volk droogvoets kon deurloop. Maar God maak ook sommer ʼn plan met die gevaar wat hulle jaag en die see maak oor hulle toe.
Wanneer ons in ʼn hoek vasgeverf word, wanneer ons tussen die duiwel en die diep blou see hang, gooi ons gou ons speelgoed uit die kot. Die menslik, né, maar dalk ook ʼn teken dat ons nie vir God vertrou nie.
Moses was rustig, al was die gevaar vinnig besig om nader te kom. Hy was rustig, want hy het eenvoudig bly glo in wat sy God kan doen. Ek weet dis moeilik, maar dis wat ons ook moet doen.
Ons moenie op die uitdaging fokus nie, maar eerder op God. Ons moet fokus op wat Hy al in die verlede gedoen het en wat Hy nou ook vir ons sal doen. Hy sal opdaag en plan maak. Vertrou net.