God het ʼn plan

ʼn Kind van God, wat regtig naby God leef, se pad word vir hom of haar goed uitgewerk. So iemand is getrou aan die leiding van die Heilige Gees en op die ou end werk alles uit. Mooi stories word geskrywe.

Dis nie altyd ʼn maklike pad nie, maar jy kom uiteindelik by die plek uit waar God wil hê jy moet wees. En in die proses het jy ʼn reuse impak op ander mense se lewens en maak jy werklik ʼn verskil. Dan word ʼn mens se lewe betekenisvol.

Josef het dit nie altyd maklik gehad nie. Hy is amper deur sy broers vermoor. Hy is in ʼn put gegooi en op die ou end aan ʼn smous verkoop, net om van hom ontslae te raak. Daarna is hy in ʼn vreemde land as slaaf verkoop.

Maar God was die hele pad saam met hom. God het hom beskerm, sodat hy byvoorbeeld nie deur sy broers doodgemaak is nie. God was steeds by hom toe hy onskuldig in die tronk gegooi is.
As ‘n mens terugkyk op Josef se lewe, sien jy dat God met ʼn lang plan gewerk het. Maak nie saak watter wêreldse dinge en besluite in sy lewe ʼn draai gemaak het nie, God het gesorg dat hy by Sy plan uitkom.

God se plan was dat Josef aan die hoof sou staan van die redding van die mense van sy tyd. Daar was ʼn groot hongersnood en die mense sou soos vlieë omgedop het, want niemand het daaraan gedink om kos weg te sit vir die maer jare nie.

God werk altyd met ʼn lang plan met almal, met al Sy kinders, met my en jou. Ja, ons het al woeste draaie geloop en keuses gemaak wat nie altyd goed was nie, en tog bewerk God dit so dat ons uitkom waar Hy ons wil gebruik.

Ja, God wil jou gebruik. Hy het ʼn groot plan vir jou, en dit sluit in om ʼn verskil in mense se lewens te maak. Glo dit net en leef dit. Die wêreld kan anders wees omdat jy daarin is!